Քրեակատարողական հիմնարկում (ՔԿՀ) գտնվելու ընթացքում կալանավորված անձին կամ դատապարտյալին թույլատրվում է իր հաշվին ստանալ և ուղարկել հանձնուքներ և ծանրոցներ, ինչպես նաև ստանալ կամ կատարել դրամական փոխանցումներ:

Ծառայությունից հնարավոր է օգտվել ֆիզիկապես՝ անձամբ այցելելով համապատասխան քրեակատարողական հիմնարկ, ինչպես նաև փոստային առաքման միջոցով։ Հանձնուքները և ծանրոցները ստացվում են աշխատանքային օրերին՝ ժամը 10:00-17:00-ն ընկած ժամանակահատվածում:

Հանձնուք կամ ծանրոց փոխանցելու և ստանալու գործընթացն իրականացվում է մի շարք պայմանների առկայության դեպքում՝

• Անհրաժեշտ է կալանավորված անձի կամ դատապարտյալի գրավոր համաձայնությունը (եթե անձը հակառակ բովանդակությամբ դիմում չի ներկայացրել, նախկինում տրված համաձայնությունը հիմք է հետագա ստացումների համար)։
• Պահանջվում է քրեակատարողական հիմնարկի պետի կամ նրա հանձնարարությամբ այլ ծառայողի թույլտվությունը։
• Հանձնուքի կամ ծանրոցի քաշը պետք է համապատասխանի սահմանված նորմերին և չգերազանցի ամսական սահմանաչափը։
• Եթե կալանավորված անձը կամ դատապարտյալը գտնվում է պատժախցում, սննդամթերք չի ընդունվում, իսկ մնացած իրերը պահպանվում և նրան են հանձնվում տույժը կրելուց հետո:

• Այցելուների համար (հանձնում)․ Այցելուն մոտենում է ՔԿՀ-ում հանձնուքներ ընդունելու համար հատուկ կահավորված սենյակ: Գործընթացն իրականացվում է ըստ հաճախման հերթականության: Այցելուն ՔԿՀ ծառայողին է փոխանցում անձը հաստատող փաստաթուղթը և դիմումը։ Հանձնուքները զննվում են և համեմատվում դիմումում նշված տեսականու հետ անձամբ այցելուի ներկայությամբ, որից հետո անձնագիրը վերադարձվում է։
• Կալանավորված անձանց/դատապարտյալների համար (ուղարկում)․ Անձը հանձնուք ուղարկելու համար գրավոր դիմում է ՔԿՀ վարչակազմին՝ նշելով պարունակությունը: Վարչակազմը ստուգում է անձնական հաշվին բավարար գումարի առկայությունը փոստային ծառայությունների համար և կազմակերպում առաքումը:

Հանձնուք կամ ծանրոց բերող այցելուն պետք է ներկայացնի՝

• Անձը հաստատող փաստաթուղթ,
• Սահմանված ձևի դիմում ։

Հանձնուքները հասցեատիրոջն են հանձնվում դիմումի վրա ստորագրությամբ՝ ընդունելուց հետո անմիջապես, սակայն ոչ ուշ, քան մեկ օրվա ընթացքում:

Հանձնուքները չեն ընդունվում և վերադարձվում են բերողին/ուղարկողին (նշելով պատճառը), եթե՝

1. Հասցեատերն ազատ է արձակվել, տեղափոխվել այլ ՔԿՀ կամ մահացել է:
2. Խախտվել են քաշի նորմերը (անհամապատասխանություն կամ գերազանցում):
3. Չեն ներկայացվել անհրաժեշտ փաստաթղթերը:
4. Առկա է հասցեատիրոջ գրավոր հրաժարականը կամ ՔԿՀ պետի պատճառաբանված որոշումը՝ անձին հանձնուք ստանալուց զրկելու վերաբերյալ:

ՔԿՀ-ում այցելուներից հանձնուքների և ծանրոցների ընդունումն անվճար է:

• Դրամական փոխանցումներ․ Կալանավորված անձին ուղարկվող կամ նրա կողմից ուղարկվող դրամը փոխանցվում է անձնական հաշվով՝ առանց սահմանափակումների:
• Ուղարկման ծախսեր․ Կալանավորված անձի կողմից փոստային առաքանի ուղարկելու կամ այլ ՔԿՀ տեղափոխվելու դեպքում հասցեագրված ծանրոցի վերահասցեագրման (եթե ՔԿՀ-ի հաշվին չէ) գումարները գանձվում են անձնական հաշվից։