Հայաստանի Հանրապետության արդարադատության նախարարության քրեակատարողական հիմնարկներում հաճախ իրականացվող տարբեր ձևաչափերի միջոցառումները ևս մեկ անգամ փաստում են այն մասին, որ սահմանափակ ազատությունը խոչընդոտ չի կարող լինել ստեղծագործ մտքի և հոգու ինքնարտահայտմանը։

Այդ մասին է վկայում այսօր՝ փետրվարի 5-ին, ՀՀ ԱՆ «Աբովյան» քրեակատարողական հիմնարկում կազմակերպված հերթական ցուցահանդեսը, որն իրականացվել էր «Իրավական կրթության և վերականգնողական ծրագրերի իրականացման կենտրոն» ՊՈԱԿ-ի և հիմնարկի սոցիալական, իրավական և հոգեբանական աշխատանքների բաժնի պետ, արդարադատության փոխգնդապետ Նունե Միքայելյանի նախաձեռնությամբ։ Ցուցահանդես-վաճառքին ներկայացվել են հինգ անչափահաս կալանավորված անձանց նկարչական և խեցեգործության աշխատանքները՝ ուշագրավ անվանումներով՝ «Երազանք», «Թռիչք», «Գիշեր», «Ես և նա», «Սպասում», «Սեր», «Քամի» և այլն։ 

Միջոցառմանը ներկա են եղել քրեակատարողական հիմնարկի վարչակազմը, աշխատակիցները, Ծառայության կենտրոնական մարմնի և ՊՈԱԿ-ի ներկայացուցիչները, ինչպես նաև ստեղծագործությունների հեղինակները։