2018 թվականի օգոստոսի 1-ին ՀՀ ԱՆ քրեակատարողական ծառայության պետի տեղակալ, արդարադատության գնդապետ Վարդգես Ծաղիկյանը և պահպանության ապահովման բաժնի պետ, արդարադատության փոխգնդապետ  Ռոբերտ Նազարյանը խորհրդակցություն անցկացրին քրեակատարողական ծառայության պահպանության ապահովման բաժնի և քրեակատարողական հիմնարկների պահպանության ապահովման բաժինների պետերի հետ: Հանդիպման ընթացքում ամփոփվեցին քրեակատարողական հիմնարկների կողմից 2018 թվականի 1-ին կիսամյակի ընթացքում պահպանության ապահովման ոլորտում իրականացված աշխատանքները:

Բացման խոսքով հանդես գալով՝ Վ. Ծաղիկյանը ներկաների ուշադրությունը հրավիրեց ծառայողական կարգապահության ամրապնդման վրա, անդրադարձավ կոռուպցիայի դեմ պայքարին՝ առանձնահատուկ շեշտելով, որ պետք է բացառել ցանկացած կոռուպցիոն դրսևորում:

Այնուհետև քրեակատարողական հիմնարկների պահպանության ապահովման բաժնի պետերին առաջարկեց ներկայացնել կիսամյակային հաշվետվությունները՝ ըստ հիմնարկների:

Հաշվետու զեկույցներում անդրադարձ կատարվեց քրեակատարողական ծառայության պահպանության ապահովման ոլորտի հաստիքային միավորների համալրվածությանը, համապատասխան ծառայողների խրախուսանքներին և տույժերին, ուղեկցորդումների քանակին, փախուստի, արգելված իրերի  ներթափանցման ու արտանետման փորձերին և կարևորություն ներկայացնող այլ հարցերի:

Քննարկվեցին յուրաքանչյուր հիմնարկի պահպանության ապահովման բաժինների գործառույթներին առնչվող հարցերը՝ կապված ոլորտի շինարարական աշխատանքների, ինժեներատեխնիկական միջոցների և այլ հրատապ խնդիրների հետ:

Ամփոփելով քննարկումը՝ ծառայության պետի տեղակալ, արդարադատության գնդապետ Վարդգես Ծաղիկյանը տվեց համապատասխան հանձնարարականներ՝ նշելով, որ հետևողական է լինելու տրված բոլոր հանձնարարականների պատշաճ կատարմանը: