Քրեակատարողական ծառայությունը, կարևորելով ազատազրկված անձանց մշակութային ժամանցի ապահովումը, «Նուբարաշեն» քրեակատարողական հիմնարկում կազմակերպել էր առանձնահատուկ միջոցառում՝ ազատազրկված անձանց հանդիպումը ճանաչված գեղանկարիչ Մայիս Մխիթարյանի հետ։  

Հանդիպման ընթացքում նկարիչը ներկայացրել է իր կյանքի ուղին՝ անդրադառնալով կենսագրության կարևոր դրվագներին, ստեղծագործական գործունեության ձևավորման փուլերին և հաղթահարած դժվարություններին։ Մայիս Մխիթարյանը խոսել է իր անցած բարդ, սակայն միևնույն ժամանակ հետաքրքիր ու ինքնատիպ ճանապարհի մասին՝ ընդգծելով արվեստի նկատմամբ ունեցած իր նվիրվածությունն ու հավատը։

Նկարիչը ներկայացրել է նաև իր բազմաժանր ստեղծագործությունները՝ բացահայտելով դրանց գաղափարական հիմքերը, ստեղծման պատմությունները և ներշնչման աղբյուրները, կիսվել իր ստեղծագործական մտահղացումների ձևավորման ընթացքով՝ շեշտադրելով սեփական ոճի առանձնահատկությունները և արվեստում ինքնարտահայտման կարևորությունը։

Հանդիպումը վերածվել է ակտիվ երկխոսության․ նկարիչը պատասխանել է ազատազրկված անձանց բազմաթիվ հարցերին՝ ձևավորելով բաց և անմիջական հաղորդակցություն։ Քննարկվել են արվեստի, ստեղծագործության, ինչպես նաև մարդու ներաշխարհի ու ինքնաճանաչման հետ կապված տարբեր թեմաներ։

Միջոցառման ավարտին գեղանկարիչը հիմնարկի գրադարանին և ազատազրկված անձանց նվիրել է իր մակագրությամբ գրքեր՝ ընդգծելով գիտելիքի ու մշակույթի կարևոր դերը անհատի զարգացման գործընթացում։