ՀՀ ԱՆ քրեակատարողական ծառայության պետի պարտականությունների ժամանակավոր կատարող, արդարադատության գնդապետ Ամբակում Գրիգորյանը շնորհակալագրեր է հանձնել Արդարադատության նախարարության թիմում ընդգրկված քրեակատարողական ծառայողներին՝ ՀՀ վարչապետի հովանու ներքո ուժային կառույցների միջև 2023 թվականի օգոստոսի 21-27-ն անցկացված բանակային խաղերին ակտիվ մասնակցելու համար: 

Ծառայության կենտրոնական մարմնի պահպանության ապահովման բաժնի պետ, արդարադատության գնդապետ Արմեն Խաչիբաբյանի գլխավորած թիմը բանակային խաղերի՝ իրավապահ համակարգի թիմային հաշվարկում նվաճել է երրորդ տեղը: Բացի այդ՝ կենտրոնական մարմնի ներքին անվտանգության բաժնի գլխավոր մասնագետ, արդարադատության փոխգնդապետ Լիանա Անդրեասյանը «Կողմնորոշում» անհատական մրցաձևում զբաղեցրել է պատվավոր երկրորդ հորիզոնականը: 

Ամբակում Գրիգորյանը շնորհավորել է թիմի անդամներին մասնակցության համար և հույս հայտնել, որ բանակային խաղերը կկրեն շարունակական բնույթ, իսկ քրեակատարողական ծառայողները բազում հաղթանակներ կգրանցեն հետագա խաղերին: Գնդապետ Գրիգորյանն ընդգծել է նաև ուժային կառույցների միջև անցկացվող խաղերի կարևորությունը՝ արդար մրցումների միջոցով ուժային համակարգի ներկայացուցիչների միջև առավել սերտ համագործակցության ամրապնդման, ինչպես նաև ֆիզիկական պատրաստվածության մակարդակում փորձի փոխանակման առումներով: