Ազատազրկված անձանց շրջանում առողջ ապրելակերպի դրսևորման, ինչպես նաև նրանց զբաղվածությանը, անձնական, մշակութային, հոգևոր  զարգացմանն ուղղված ծրագրի շրջանակներում շարունակվում են կազմակերպվել տարբեր բնույթի միջոցառումներ։ 

Մասնավորապես սույն թվականի փետրվարի 11-ից 14-ը Հայաստանի Հանրապետության արդարադատության նախարարության «Վանաձոր» և «Նուբարաշեն» քրեակատարողական հիմնարկների սոցիալական, հոգեբանական և իրավական աշխատանքների բաժինների նախաձեռնությամբ կազմակերպվել էր ներհիմնարկային շախմատի մրցաշար, «Սևան» ՔԿՀ-ում իրականացվել էր սեղանի թենիսի, իսկ «Վարդաշեն» ՔԿՀ-ում՝ բիլիարդի առաջնություններ։ Սպորտային միջոցառումներին ընդհանուր առմամբ մասնակցել է շուրջ չորս տասնյակ դատապարտյալ։ Հաղթողներին հիմնարկի վարչակազմի կողմից շնորհվել են շնորհակալագրեր։ 

Փետրվարի 12-ին ՀՀ ԱՆ «Աբովյան» ՔԿՀ-ում ՍՀԻԱ բաժնի կողմից նշվել է երիտասարդների բարեխոս Ս․ Սարգիս զորավարի հիշատակության օրը։ Հիմնարկի հոգևոր հովիվ Տեր Արսեն քահանա Համբարձումյանը օրհնել է ներկաներին և տերունական աղոթքով մեկնարկել միջոցառումը։ Մասնակից կին դատապարտյալները ներկայացրել են օրվա խորհուրդը, արտասանել են սիրո մասին բանաստեղծություններ։ Արարողության ավարտին մասնակիցներին բաժանվել են աղի բլիթներ։ Հաջորդ օրը՝ փետրվարի 13-ին ազատազրկված կանանց նախաձեռնությամբ և մասնակցությամբ հիմնարկի բակում նշվել է նաև Տյառնընդառաջը։