«Քաղաքացիական հասարակության ինստիտուտ» ՀԿ տնօրեն, հաշտարար Արտակ Կիրակոսյանը ՀՀ արդարադատության նախարարության «Դատապարտյալների հիվանդանոց» քրեակատարողական հիմնարկի անձնակազմի համար, ինչպես նաև «Արմավիր» և «Վարդաշեն» քրեակատարողական հիմնարկների ազատազրկված անձանց համար անցկացրել է «Կոնֆլիկտների կառավարում» դասընթացը։  

«Դատապարտյալների հիվանդանոց» քրեակատարողական հիմնարկի անձնակազմին դասընթացավարը, ի թիվս այլնի, ներկայացրել է կոնֆլիկտի խորացման փուլերը, տարբեր փուլերում միջամտության հնարավորությունները և տեխնիկաները։ Քննարկվել են նաև ծառայության ժամանակ առաջացող կոնկրետ իրավիճակներ, դրանց լուծման հնարավոր տարբերակները։

Ազատազրկված անձանց համար անցկացվել են երկօրյա դասընթացներ, որոնց ընթացքում Արտակ Կիրակոսյանը խոսել է կոնֆլիկտների առաջացման հիմնական պատճառների, դրանց կանխարգելման ու հաղթահարման ուղիների մասին։

Դասընթացների ավարտին Արտակ Կիրակոսյանի կողմից հավաստագրեր են  հանձնվել  մասնակից ազատազրկված անձանց։