Միջոցառումներ քրեակատարողական հիմնարկներում՝ նվիրված Հայոց բանակի օրվան
հունվարի 30, 2023
Հայաստանի Հանրապետության արդարադատության նախարարության «Աբովյան» քրեակատարողական հիմնարկում սոցիալական, հոգեբանական և իրավական աշխատանքների բաժնի նախաձեռնությամբ Բանակի տոնի կապակցությամբ կազմակերպվել էր կինոդիտում․ ներկայացվել է ռեժիսոր Վահագն Գրիգորյանի «Ես եմ» ֆիլմը։
Ֆիլմը նկարահանվել է 2012 թվականին և նվիրված է Հայոց բանակի 20-ամյակին։ Մինչ կինոդիտումը՝ ազատազրկված կանայք հարգանքի և երախտագիտության խոսքեր են ուղղել երկրի սահմանները պահող զինվորներին, մասնավորապես՝ իրենց կյանքը հանուն հայրենիքի զոհած հայորդիներին։
Բանակի օրվա միջոցառումներ են կազմակերպվել նաև ՀՀ ԱՆ «Սևան» և «Արթիկ» քրեակատարողական հիմնարկներում։
«Սևան» քրեակատարողական հիմնարկում միջոցառումը կազմակերպվել է ՀՀ ԱՆ «Իրավական կրթության և վերականգնողական ծրագրերի իրականացման կենտրոն» ՊՈԱԿ-ի կողմից իրականացվող «Իրավախախտում կատարած անձանց գեղագիտական դաստիարակության և կրթական ծրագրերի իրականացում՝ առանց տարիքային սահմանափակման» ծրագրի շրջանակներում, «Հայոց պատմություն» առարկայից: Միջոցառումը տեղի է ունեցել հիմնարկի սոցիալական, հոգեբանական և իրավական աշխատանքների բաժնի օժանդակությամբ և ՔԿՀ-ում գործող մշակութային ինքնագործ միավորման խմբի անդամ դատապարտյալների մասնակցությամբ:
Պատմության ուսուցիչ Կամո Առաքելյանը ներկայացրել է հայկական բանակի ստեղծման պատմական իրողությունը, ստեղծման անհրաժեշտության նախադրյալները։ Միջոցառման ընթացքում ցուցադրվել է նաև օրվա խորհրդին նվիրված փաստավավերագրական ֆիլմ, այնուհետև տեղի է ունեցել զրույց-քննարկում ֆիլմում առկա հայրենասիրական գաղափարների վերաբերյալ:
ՀՀ ԱՆ «Արթիկ» քրեակատարողական հիմնարկում ևս կազմակերպվել է տոնական միջոցառում հիմնարկի սոցիալական, հոգեբանական և իրավական աշխատանքների բաժնի ու «Իրավական կրթության և վերականգնողական ծրագրերի իրականացման կենտրոն» ՊՈԱԿ-ի հետ համատեղ։ Պատմության ուսուցիչ Արմեն Սարգսյանը փաստագրական ֆիլմերի միջոցով և դասախոսությամբ ներկայացրել է բանակի ստեղծման պատմությունը։ Միջոցառմանը ակտիվ մասնակցություն են ունեցել ազատազրկված անձինք՝ հիշատակելով բանակի կայացման հիմքում կանգնած անձանց, արցախյան պատերազմների մասնակիցներին՝ մեջբերելով նրանց հիշարժան խոսքերն ու կյանքի կարևոր իրադարձությունները։