Վերասոցիալականացման գործընթացի արդյունավետության բարձրացման նպատակով տարբեր մշակութային կենտրոններ և հասարակական կազմակերպություններ ՀՀ ԱՆ քրեակատարողական հիմնարկների սոցիալական, հոգեբանական և իրավական աշխատանքների բաժինների հետ համատեղ պարբերաբար կազմակերպում են բազմաբնույթ մշակութային միջոցառումներ և հանդիպումներ ազատազրկված անձանց հետ:

Վերոնշյալ միջոցառումների շրջանակներում «Իրավական նախաձեռնությունների կենտրոն» հասարակական կազմակերպության նախագահ Նարե Հովհաննիսյանը և Պարույր Սևակի տուն-թանգարանի տնօրեն, գրականագետ Սևակ Ղազարյանը հյուրընկալվել են «Աբովյան» քրեակատարողական հիմնարկում:

Ս. Ղազարյանը հետաքրքիր փաստեր է ներկայացրել Պարույր Սևակի կյանքից և ստեղծագործական գործունեությունից, ինչպես նաև ծավալված զրույցի ընթացքում պատասխանել է ազատազրկված անձանց հետաքրքրող հարցերին: 

Հանդիպման ավարտից հետո տուն-թանգարանի տնօրեն Սևակ Ղազարյանը շրջայց է կատարել հիմնարկի ուսումնական սենյակներում և գրադարանում: Ազատազրկված անձանց՝ գրքի հանդեպ հետաքրքրությունը առավել խթանելու համար թանգարանի կողմից հիմնարկի գրադարանին նվիրաբերվել է 30 միավոր տարբեր ժանրերի գիրք: