Հայաստանի Հանրապետության արդարադատության նախարարության «Արմավիր» քրեակատարողական հիմնարկի օպերատիվ բաժնում տեղեկություններ են ստացվել այն մասին, որ իրականացվելու է թմրամիջոցների ներթափանցման փորձ հիմնարկ: Իրացնելով նշված տվյալները՝ «Արմավիր» ՔԿՀ-ի, Քրեակատարողական ծառայության կենտրոնական մարմնի և ՀՀ ՆԳՆ ոստիկանության Կենտրոնական բաժնի օպերատիվ բաժինների ծառայողները մայիսի 26-ին՝ ժամը 23:00-ի սահմաններում, համատեղ իրականացրել են միջոցառումներ և ապօրինի թմրանյութ պահելու և օգտագործելու հիմնավոր կասկածով Արարատի մարզում ձերբակալել են քաղաքացիներ Է.Բ-ին և Վ.Փ.-ին ու վերջինիս կողմից վարած ավտոմեքենայով տեղափոխել ՀՀ ՆԳՆ Ոստիկանության կենտրոնական բաժին: 

Է.Բ.-ի անձնական խուզարկությամբ հայտնաբերվել է պոլիէթիլենային տոպրակի մեջ լցված 0,62 գրամ քաշով դեղնականաչավուն զանգված, ինչպես նաև՝ գաղտնի փականով ծալովի դանակ:

Հաջորդ օրը՝ մայիսի 27-ին, նշված ավտոմեքենայի զննության ընթացքում վարորդը՝ Վ.Փ.-ն, ուղևորի նստատեղի հետնամասից ներկայացրել է ընդհանուր 0,8 գրամ քաշով, «B8» գրառմամբ սուբուտեքս թմրամիջոցի 2 դեղահաբ, ինչպես նաև պոլիէթիլենային տոպրակների մեջ լցված, ընդհանուր 1,5 գրամ քաշով, մարիխունա տեսակի թմրամիջոցին նմանվող դեղնականաչավուն զանգված և 3,5 գրամ քաշով, ափիոն տեսակի թմրամիջոցին նմանվող, սև, կոշտ զանգված: 

Վարորդ Վ.Փ.-ն հայտարարել է, որ հայտնաբերվածները պատկանում են ուղևոր Է.Բ.-ին, վերջինս նույնպես հայտարարել է, որ Վ.Փ.-ն տեղյակ չի եղել նշված փաթեթներից, և դրանք պատկանում են իրեն: 

ՀՀ ՔԿ Երևան քաղաքի Կենտրոն և Նորք-Մարաշ վարչական շրջանների քննչական բաժնում նախաձեռնվել է քրեական վարույթ: 

Ծանուցում․ Ենթադրյալ հանցանքի մեջ կասկածվողը կամ մեղադրվողը համարվում է անմեղ, քանի դեռ նրա մեղավորությունն ապացուցված չէ ՀՀ քրեական դատավարության օրենսգրքով սահմանված կարգով՝ դատարանի՝ օրինական ուժի մեջ մտած դատավճռով։