Քրեակատարողական ծառայության ՍՀԻԱ բաժնի գլխավոր հոգեբանը ԵՊՀ-ում մասնակցել է «Հոգեբանն աշխատաշուկայում» կոնֆերանսին
նոյեմբերի 27, 2024
Նոյեմբերի 26-ին Երևանի պետական համալսարանի փիլիսոփայության և հոգեբանության ֆակուլտետի ուսանողական խորհրդի նախաձեռնությամբ տեղի է ունեցել «Հոգեբանն աշխատաշուկայում» կոնֆերանս։
Կոնֆերանսին մասնակցել է ՀՀ ԱՆ քրեակատարողական ծառայության կենտրոնական մարմնի սոցիալական, հոգեբանական և իրավական աշխատանքների բաժնի գլխավոր հոգեբան Ցողիկ Ալեքսանյանը՝ հոգեբանության բաժնի բակալավրիատի և մագիստրատուրայի ուսանողներին ներկայացնելով քրեակատարողական ոլորտը, ազատությունից զրկված անձանց շրջանում հոգեբանական աշխատանքի առանձնահատկությունները, հոգեբանի դերն ու կարևորությունը։
Ուսանողները մեծ հետաքրքրություն են ցուցաբերել իրենց համար նոր բնագավառի նկատմամբ և ցանկություն հայտնել ուսումնասիրել նաև քրեակատարողական ոլորտը՝ որպես հնարավոր մասնագիտական աշխատանք դիտարկելու համար։
Կոնֆերանսին, բացի Քրեակատարողական ծառայությունից, իրենց զեկույցներով հանդես են եկել նաև Հայկական կարմիր խաչի ընկերության, «Աուտիզմ» ազգային հիմնադրամի, «Ուղեկից» և «Կտուրի տակ» հոգեբանական կենտրոնների ներկայացուցիչները։