ՀՀ արդարադատության նախարարության քրեակատարողական հիմնարկներում նշել են Հիսուս Քրիստոսի հրաշափառ Հարության տոնը, որը Հայ Առաքելական եկեղեցու հինգ տաղավար տոներից մեկն է։

«Արթիկ» քրեակատարողական հիմնարկում հոգևոր հովիվ Տեր Լևոն քահանա Հովհաննիսյանն անցկացրել է Զատկի տոնական արարողություն և հոգեհանգստի կարգ, իսկ «Աբովյան» քրեակատարողական հիմնարկի հոգևոր հովիվ Տեր Արսեն քահանա Համբարձումյանն ազատազրկված կանանց ներկայացրել է Տոնի խորհուրդը, օրհնել հարության և կյանքի խորհրդանիշ զատկական ձվերը, այնուհետև ներկված ձվերը բաժանվել են ազատազրկված կանանց։ 

Արարատյան Հայրապետական թեմի Կաթողիկե Սուրբ Աստվածածին և Սուրբ Աննա եկեղեցիների հոգևոր հովիվ Տեր Զենոն քահանա Բարսեղյանը «Դատապարտյալների հիվանդանոց» և «Երևան-Կենտրոն» քրեակատարողական հիմնարկներում կատարել է զատկական տնօրհնեք, յուղի օրհնության կարգ, հնչեցրել տիրոջ հարության ավետիսը։ Միջոցառումներն ավարտվել են տերունական աղոթքով, իսկ զատկական ձվերը բաժանվել են ներկաներին։

Տեր Տիգրան քահանա Հակոբյանի ձեռամբ նաև Զատկի տոնական արարողություն և տնօրհնեք է իրականացվել «Գորիս» քրեակատարողական հիմնարկում, իսկ Գուգարաց թեմի առաջնորդ Տեր Հովնան Եպիսկոպոս Հակոբյանի ձեռամբ Հիսուս Քրիստոսի հրաշափառ Հարության տոնին նվիրված արարողություն է իրականացվել «Վանաձոր» քրեակատարողական հիմնարկում: